أداء القطاع في فايف ام — التقرير اليومي وترتيب الأعضاء

صفحة أداء القطاع في أوركا بوت لقطاعات فايف ام (FiveM): أداء كل عضو لأي فترة بساعات العمل والإشراف والدخول، وتقييم حسب أهدافك، وتقرير يومي يوصل قناة الديسكورد.

مكان الصفحة: لوحة القطاع ← «معلومات القطاع» ← «أداء القطاع» — لوحة القطاع ← «الرصد» ← «اعدادات الرصد» — لوحة السيرفر ← «نظرة عامة» ← «أداء القطاعات»

«أداء القطاع» في أوركا بوت هي الصفحة اللي تعرف منها مين شغّال فعلاً في قطاعك على فايف ام. تختار أي فترة، من يوم واحد لين 366 يوم، وتشوف أرقام القطاع كامل وكل عضو بوقت عمله وتقارير إشرافه ووقته في اللعبة ونقاطه وتفاعله. الأعضاء يترتبون بـ«التقييم» اللي تحدد بنوده وأهدافه بنفسك، وكل يوم يوصل قناة في الديسكورد تقرير أداء اليوم اللي قبله مع أفضل 5 أعضاء.

ماذا تقدم صفحة «أداء القطاع»؟

أرقام القطاع لأي فترة مع التغيّر عن الفترة اللي قبلها.
جدول الأعضاء مرتّب حسب «التقييم»، وتفاصيل كل عضو في نفس الفترة.
تقرير يومي في الديسكورد للاطلاع بس، وبدون أي إجراء على أحد.
النشاط الحقيقي بس: الساعات والأيام وتقارير الإشراف اللي تنضاف يدوياً ما تدخل في الحساب.

اختيار الفترة

افتح «أداء القطاع». تبدأ على «آخر 7 أيام»، إلا لو فتحتها من رابط فيه فترة.
اضغط فترة جاهزة: «اليوم» أو «أمس» أو «آخر 7 أيام» أو «آخر 30 يومًا» أو «هذا الشهر».
أو اختر «من» و«إلى» واضغط «عرض». أطول فترة 366 يوم.
تحتها يطلع «تعرض الآن» مع الفترة وعدد أيامها، ولو الفترة فيها اليوم يطلع «تشمل اليوم الجاري — الأرقام تتغيّر حتى منتصف الليل».

الأيام تنحسب بتوقيت السيرفر («المنطقة الزمنية» في إعدادات السيرفر)، ورابط الصفحة يحفظ الفترة فتقدر ترسله لقائد ثاني. على الجوال الفترات الجاهزة في صف واحد تسحبه، والتاريخين من زر «فترة مخصصة».

أرقام القطاع

«إجمالي ساعات العمل»: وقت الأعضاء في تقارير العمليات.
«الأعضاء العاملون»: كم عضو اشتغل في تقرير عمليات، وتحته «من أصل … في القطاع».
«تقارير الإشراف»: تقارير الإشراف اللي أرسلها الأعضاء.
«دخلوا اللعبة»: كم عضو دخل سيرفر فايف ام، وتحته عدد الجلسات.
«إجمالي النقاط» لو نظام «النقاط» شغّال، و«التفاعل الصوتي» مع عدد الرسائل لو «تفاعل الديسكورد» شغّال (من القنوات اللي يتابعها القطاع في نظام التفاعل).

«إجمالي ساعات العمل» و«الأعضاء العاملون» و«تقارير الإشراف» فيها نسبة التغيّر «من الفترة السابقة»، يعني فترة بنفس الطول قبل فترتك على طول: يوم مقابل اليوم اللي قبله، و7 أيام مقابل الـ7 اللي قبلها. وبطاقة الساعات وعمود «وقت العمل» يختفون لو «التقارير» مطفي، وبطاقة الإشراف وعموده لو «الإشراف» مطفي.

جدول «حضور الأعضاء في الفترة»

يطلع فيه أعضاء القطاع الحاليين (ومعهم اللي في إجازة) اللي سجّلوا أي نشاط في الفترة: وقت عمل، أو جلسة لعب خلصت، أو تقرير إشراف، أو نقاط، أو تفاعل (النقاط والتفاعل لما نظامها شغّال). اللي ما سوى شي ما يطلع، فالجدول الفاضي معناه ما أحد سجّل نشاط. والعضو اللي طلع من القطاع ما يطلع حتى لو اشتغل في الفترة.

العمود	وش يعرض
«#»	مركز العضو في ترتيب الفترة، وأول 3 مراكز لها علامة مميزة
«التقييم»	نسبته من أهدافك (شوف الفقرة الجاية)
«العضو»	اسمه ورتبته وكوده
«وقت العمل»	وقته في تقارير العمليات، وتحته أكثر 3 أماكن اشتغل فيها
«الإشراف»	عدد تقارير الإشراف اللي أرسلها
«الدخول»	وقته في سيرفر فايف ام وعدد جلساته
«أيام»	أيام حضوره في الفترة
«النقاط»	صافي نقاطه، لو «النقاط» شغّال
«التفاعل»	وقته الصوتي وعدد رسائله، لو «تفاعل الديسكورد» شغّال

«أيام» تعدّ كل يوم دخل فيه تقرير عمليات، أو انرسل فيه تقرير نقاط هو فيه وانعتمدت نقاطه (لما «النقاط» شغّال، والتقرير اللي ينتظر الاعتماد ما يحسب يوم)، ومعها يوم مراجعته لتقرير نقاط لو «احتساب المراجعة يوم حضور» شغّال. وفوق الجدول بحث بالاسم أو الكود، و10 أعضاء بكل صفحة. البحث يفلتر الصفوف بس، ورقم «#» يظل مركز العضو في الترتيب الكامل.

كيف ينحسب «التقييم» والترتيب؟

فوق الجدول سطر «الترتيب حسب» يقول لك البنود المستخدمة، مثل «متوسط: ساعات العمل + تقارير الإشراف»، وزر «كيف يُحسب التقييم؟» يعرض الطريقة و«أهداف هذه الفترة:».

نسبة كل بند = قيمة العضو ÷ الهدف × 100، وأعلاها 100%. والقيمة السالبة (مثل نقاط ناقصة) تنحسب 0%.
«التقييم» = متوسط نسب البنود المختارة.
الهدف يومي ويتضرب في عدد أيام الفترة: هدف 4 ساعات يصير 28 ساعة في «آخر 7 أيام».
لو اخترت بند واحد، الترتيب يكون بالقيمة نفسها: بهدف 4 ساعات، اللي اشتغل 6 ساعات قبل اللي اشتغل 5 مع إن الاثنين 100%.
عند التعادل يتقدّم الأكثر وقت عمل، ثم الأكثر وقت دخول.

مثال: الترتيب على «ساعات العمل» (الهدف 4 ساعات) و«تقارير الإشراف» (الهدف 2) ليوم واحد:

[P-012] سعود: 3 ساعات = 75%، وتقريرين إشراف = 100%، فتقييمه 87.5%.
[P-020] فهد: 6 ساعات = 100% (الحد)، وبدون إشراف = 0%، فتقييمه 50%.

سعود يطلع فوق فهد مع إن ساعاته أقل. والبنود لها نفس الوزن، فالهدف هو اللي يحدد تأثير البند: «كل ما الهدف أقل، كل ما البند أثّر أكثر في الترتيب». حط أهداف يقدر يوصلها العضو النشيط.

البند اللي نظامه مطفي ما ينحسب ويختفي من «الترتيب حسب». ولو كل البنود اللي اخترتها أنظمتها مطفية، الترتيب يرجع لـ«ساعات العمل»، أو لـ«وقت الدخول» لو «التقارير» مطفي.

تفاصيل العضو

اضغط أي صف وتنفتح نافذة العضو لنفس الفترة (على الجوال تطلع من تحت)، فوقها صورته وكوده ورتبته ودائرة «التقييم»، وفيها 5 تبويبات:

«ملخص»: مجاميعه، و«كيف تكوَّن التقييم» لكل بند بقيمته وهدفه ونسبته، و«توزيع وقت العمل على الأماكن».
«التقارير»: كل تقرير عمليات دخله ووقته فيه، وأماكنه بنوع كل توزيع («أساسي» أو «مشرف» أو «مشتركة»)، واللي لسا شغّال عليه «مستمر».
«الدخول»: جلساته في السيرفر واسمه داخل اللعبة. الجلسة اللي ما خلصت ما تدخل في المجموع لين يطلع، وتطلع «متصل الآن» وهو داخل السيرفر.
«الإشراف»: تقارير الإشراف اللي أرسلها، بمكانها ونجومها وكم عضو قيّم.
«النقاط»: كل حركة نقاط بمصدرها وسببها، واللي جت من برقية عليها «يدوي».

وتحت زر «فتح ملف العضو» يوديك لملفه.

التقرير اليومي في الديسكورد

كل يوم في «موعد الإرسال» (الافتراضي 00:00 بتوقيت السيرفر) ينزل في «قناة التقرير اليومي» تقرير عن آخر يوم كامل، من منتصف الليل لمنتصف الليل. يعني لو خليت الموعد 08:00، يوصلك الساعة 8 الصبح تقرير أمس كامل. فيه:

العنوان «أداء القطاع —» مع تاريخ اليوم اللي يغطيه التقرير، واسم القطاع في ذيل الرسالة.
«📊 ملخص أداء اليوم»: أرقام القطاع لذاك اليوم، ومعها كم عضو نشِط من أعضاء القطاع.
«🏆 أفضل 5 (حسب …)»: 🥇🥈🥉 ثم 4️⃣ و5️⃣، كل عضو بمنشنه وتقييمه ووقت عمله، ومعها تقارير إشرافه وجلساته ونقاطه لو عنده. ولو ما أحد سجّل نشاط تكتب «لا يوجد نشاط مسجّل لهذا اليوم.»
طريقة الحساب والأهداف (لو فيه أعضاء في القائمة)، ثم رابط «لعرض تقرير الأعضاء الكامل من هنا» يفتح «أداء القطاع» على نفس اليوم.

الإعدادات

من «اعدادات الرصد» ← قسم «أداء القطاع» آخر الصفحة (للقادة والإدارة)، والتعديل ينحفظ من شريط الحفظ أسفل الصفحة:

«تفعيل التقرير اليومي»: يشغّل رسالة الديسكورد أو يوقفها (الافتراضي شغّال). الصفحة تظل شغّالة في الحالتين.
«قناة التقرير اليومي»: معالج إنشاء القطاع يعبّيها من قناة «أداء القطاع». لو فضّيتها ما ينرسل شي لين تختار قناة. البوت يحتاج فيها VIEW_CHANNEL وSEND_MESSAGES وEMBED_LINKS، والقناة اللي ما يقدر يكتب فيها تطلع مقفلة ومكتوب «البوت لا يستطيع النشر هنا — يحتاج: …». والقائد يختار من القنوات المسموحة لقطاعه بس.
«موعد الإرسال (بتوقيت السيرفر)»: وقت الإرسال كل يوم (الافتراضي 00:00).
«ترتيب الأعضاء في التقرير»: بند أو أكثر من «ساعات العمل» و«وقت الدخول» و«تقارير الإشراف» و«النقاط» و«التفاعل الصوتي» و«الرسائل». الافتراضي «ساعات العمل»، وفي سيرفرات vRP يبدأ القطاع الجديد على «النقاط». البند اللي نظامه مطفي يطلع عليه تحذير إنه بيتجاهل لين تشغّله، ولو شلت كل البنود يرجع «ساعات العمل».
«أهداف التقييم (100%)»: الهدف اليومي لكل بند. الافتراضي 24 ساعة لـ«ساعات العمل» و«وقت الدخول» و«التفاعل الصوتي»، و24 لـ«تقارير الإشراف»، و100 لـ«النقاط»، و1000 لـ«الرسائل». أهداف الوقت بساعات كاملة من 1 لين 720، والأعداد من 1 لين 100000.

نفس الترتيب والأهداف تمشي على الصفحة وعلى رسالة الديسكورد.

«أداء القطاع» في «معلومات القطاع» و«أداء القطاعات»

في صفحة «معلومات القطاع» بطاقة «أداء القطاع» فيها رسم لساعات العمل والأعضاء النشطين: «بالساعات» (آخر 24 ساعة) أو «يومي» (10 أيام) أو «أسبوعي» (8 أسابيع) أو «شهري» (12 شهر)، مع «السابق/التالي». اضغط أي نقطة تفتح «أداء القطاع» على تلك الفترة (في «بالساعات» تفتح اليوم كله). والقطاع اللي «التقارير» عنده مطفي و«النقاط» شغّال يشوف النقاط بدل الساعات.

وفي لوحة السيرفر صفحة «أداء القطاعات» للإدارة وقادة القطاعات، تقارن القطاعات على نفس الفترة ونفس «المقياس المقارَن»، والضغط على أي قطاع في «جدول المقارنة» يفتح صفحة «أداء القطاع» حقته على نفس الفترة (لمن يقدر يفتحها). «التقييم» ما يطلع هناك لأن كل قطاع له أهدافه. الشرح في لوحة تحكم السيرفر.

الصلاحيات

«عرض أداء القطاع» (قسم «الرصد» في «صلاحيات الأوامر»): تفتح «أداء القطاع» لأي فترة ونافذة تفاصيل كل عضو، للعرض بس. ما تكون مع أحد افتراضياً، وما عليها شارة «خطير».
«اعدادات الرصد» وبطاقة «أداء القطاع» في «معلومات القطاع» للقادة والإدارة بس وما تتفوّض.
قادة القطاع والإدارة (مالك السيرفر ومن عنده ADMINISTRATOR) يشوفون كل شي بدون صلاحيات.

ملاحظات مهمة

الصفحة تحسب الأرقام من جديد كل ما تفتحها وما تحفظ نسخة، فأي يوم قديم يعرض آخر شي صار فيه.

الساعات والأيام وتقارير الإشراف اللي تنضاف أو تنخصم ببرقيات «تحكمات القادة» (مثل «إضافة ساعات عمل») ما تدخل هنا. أما النقاط فتشمل برقيات «منح نقاط» و«إزالة نقاط» — شوف نظام البرقيات.
وقت العضو في تقرير العمليات ينحسب كله لليوم اللي انضاف فيه للتقرير، وجلسة اللعبة لليوم اللي بدأت فيه، حتى لو كملوا بعد منتصف الليل.
رسالة اليوم تنرسل مرة وحدة وما تنعاد لو فشلت (مثل لو انسحبت صلاحيات البوت من القناة)، وتغيير الموعد ما يكرر يوم انرسل. والقطاع المعطّل ما ينرسل له تقرير.

أسئلة شائعة

ليش ما وصل تقرير أداء القطاع في الديسكورد؟

تأكد إن «تفعيل التقرير اليومي» شغّال و«قناة التقرير اليومي» مختارة في «اعدادات الرصد»، وإن البوت عنده VIEW_CHANNEL وSEND_MESSAGES وEMBED_LINKS فيها، وإن القطاع مفعّل. الرسالة ما تنعاد لو فشلت، بس أرقام اليوم كاملة موجودة في صفحة «أداء القطاع».

التقرير اللي يوصل الساعة 12 بالليل، أي يوم يغطي؟

اليوم اللي خلص للتو كامل، من منتصف الليل لمنتصف الليل بتوقيت السيرفر. وأي موعد تختاره، التقرير دايم عن آخر يوم كامل.

ليش أرقام الصفحة تختلف عن رسالة الديسكورد؟

الرسالة تنحسب لحظة إرسالها، والصفحة تنحسب من جديد كل ما تفتحها. فالوقت اللي كمله العضو بعد منتصف الليل في تقرير دخله قبله، والجلسات اللي خلصت بعد الإرسال، تنضاف لنفس اليوم. والصفحة ترتّب بإعدادات الترتيب الحالية، والرسالة بالإعدادات اللي كانت وقت إرسالها.

ليش ساعات العضو هنا تختلف عن ساعاته في الترقية؟

«أداء القطاع» يعرض النشاط الحقيقي بس، فبرقيات «إضافة ساعات عمل» و«خصم ساعات عمل» ما تدخل هنا لكنها تدخل في وقت عمله في الترقية. وتأكد إنك تقارن نفس الفترة، لأن الترقية تحسب من «تاريخ بداية احتساب شروط الترقية» حقه.

ليش عضو داخل اللعبة الحين ما يطلع في جدول «اليوم»؟

جلسة اللعبة ما تنحسب إلا بعد ما يطلع من السيرفر. أما وقته في تقرير العمليات فينحسب أول بأول، فلو هو موزّع في تقرير يطلع أول ما تحدّث الصفحة.

أقدر أوقف رسالة الديسكورد وأخلي الصفحة؟

إيه. طفّ «تفعيل التقرير اليومي» أو فضّ «قناة التقرير اليومي» واحفظ. الصفحة تظل شغّالة لأي فترة، والرسالة اليومية بس اللي توقف.