برقياتي والتراجع عن البرقية في فايف ام — إحصائيات المسؤولين

«برقياتي» في أوركا بوت لقطاعات فايف ام (FiveM): سجل برقياتك، وإحصائيات مسؤولي البرقيات، والتراجع عن البرقية خلال 48 ساعة، وحدود البرقيات وفترات الانتظار.

مكان الصفحة: لوحة القطاع ← «البرقيات وربط الأحداث» ← «برقياتي» — لوحة القطاع ← «البرقيات وربط الأحداث» ← «احصائيات مسؤولين البرقيات» — لوحة القطاع ← «البرقيات وربط الأحداث» ← «البرقيات» (زر «تراجع عن البرقية» في «سجل البرقيات»)

«برقياتي» في أوركا بوت تجمع لك كل برقية كتبتها في قطاعك على سيرفر فايف ام، مع أرقامك والتراجعات اللي صارت عليها. و«احصائيات مسؤولين البرقيات» توري مين يكتب برقيات القطاع، وكم، ووش أنواعها. ولو نزلت برقية بالغلط، زر «تراجع عن البرقية» يعكسها خلال 48 ساعة ويرجّع اللي سوّته، غالباً ببرقية تراجع جديدة، والأصلية تبقى في السجل.

وش تقدم لك هذي الصفحات؟

«برقياتي»: ملف برقياتك لأي فترة، بأرقامه وسجله وزر التراجع.
«احصائيات مسؤولين البرقيات»: أرقام كل المسؤولين، وأعلى 5، وملف أي مسؤول بضغطة.
«تراجع عن البرقية»: معاينة كاملة قبل التنفيذ، وتختار الأعضاء اللي تتراجع عنهم.
حدود البرقيات وفترات الانتظار: حد لعدد الأعضاء في البرقية، ومدة قبل إعادة الإجراءات الكبيرة.

صفحة «برقياتي» (ملف البرقيات)

تظهر لكل من يقدر يكتب برقية (شوف «الصلاحيات» تحت)، وتفتح دايماً على برقياتك أنت.

البطاقة فوق: صورتك واسمك ورتبتك و«الكود» و«آخر برقية»، وتحتها أربعة أرقام للفترة المختارة:

«البرقيات»: عدد البرقيات اللي كتبتها.
«إجراءات على الأعضاء»: كل عضو في كل برقية، فبرقية ترقية لخمسة أعضاء = 5.
«أعضاء مختلفون»: كم شخص شملتهم برقياتك.
«تم التراجع عنها»: كم إجراء من إجراءاتك انعكس بعدين.

الفترة: «الأسبوع» (يبدأ من السبت بتوقيت السيرفر) و«الشهر» و«السنة» و«منذ آخر ترقية» و«منذ بداية الاحتساب» (الافتراضي) و«الكل» و«مخصص». فترتا «منذ …» تبدأ من تاريخ آخر ترقية لك أو تاريخ بداية احتساب شروط الترقية حقّك، وتحتها سطر فيه التاريخ، ولو ما عندك تاريخ تنعرض كل البرقيات. وفي «مخصص» لازم تختار البداية والنهاية.

ثلاث تبويبات:

«نظرة عامة»: «حسب نوع البرقية» يعرض شغلك في كل نوع (المبالغ، النقاط، الساعات والأيام، الدورات والإنذارات، أو عدد الأعضاء)، وتضغط النوع يفتح برقياته في السجل. ومعها رسم النشاط و«آخر البرقيات».
«سجل البرقيات»: برقياتك مجمّعة حسب اليوم، وتبحث بالسبب أو رقم البرقية أو باسم العضو أو كوده. كل برقية عليها نوعها ورقمها و«صامتة» أو «مجهولة» وشارات التراجع، ومعها «عرض التفاصيل» و«تراجع عن البرقية».
«التراجع»: قائمتين: «تراجع عنها آخرون» (برقياتك اللي عكسها مسؤول ثاني، مين ومتى) و«عمليات تراجع نفّذتها».

برقيات التراجع اللي كتبتها تطلع في سجلك، لكنها ما تنحسب في «البرقيات»، تنحسب كعمليات تراجع. وعلى الجوال كل تبويب يفتح كشاشة لحاله.

«احصائيات مسؤولين البرقيات»

فوق تختار الفترة: «الأسبوع» و«الشهر» (الافتراضي) و«السنة» و«الكل» و«مخصص»، وتقدر تحصر الأرقام بـ«أنواع البرقيات»، وكل أرقام الصفحة تتحدث معها.

أربعة أرقام: «إجمالي البرقيات» مع الفرق «عن الفترة السابقة» (فترة بنفس الطول قبلها مباشرة، وما يظهر في «الكل»)، و«مسؤولون كتبوا برقيات»، و«متوسط البرقيات للمسؤول»، و«عمليات التراجع».
«الأعلى في …»: أكثر 5 مسؤولين كتابة، مع برقياتهم وإجراءاتهم و«أكثر نوع» والتغيّر عن الفترة السابقة.
«البرقيات حسب النوع» (أول 7 أنواع والباقي «أنواع أخرى») ورسم النشاط مقسوم بين «الأعلى 5» و«بقية المسؤولين».
«كل المسؤولين»: كل من كتب برقية في الفترة، وكل عضو حالي يملك صلاحية كتابة حتى لو ما كتب شي، مرتّبين بعدد البرقيات. اللي طلع من القطاع يظهر بس لو له برقيات في الفترة، وعليه «ليس في القطاع حاليًا».

تضغط أي مسؤول يفتح «ملف البرقيات» حقّه بنفس شكل «برقياتي». والبرقيات اللي يطلعها النظام بنفسه، مثل الرصد التلقائي وجوائز لوحات المتصدرين، ما لها كاتب فما تنحسب لأحد. ولرصد عمل الأعضاء بين تاريخين فيه «رصد المسؤولين (البرقيات)» في نظام الرصد.

التراجع عن البرقية خطوة بخطوة

اضغط «تراجع عن البرقية» من «سجل البرقيات» في صفحة «البرقيات»، أو من «برقياتي»، أو من صفحة تفاصيل البرقية.
تطلع معاينة فيها كل خطوة بالترتيب: كل برقية جديدة بتنزل (نوعها وقناتها، و«صامتة» أو «مجهولة» لو الأصلية كذا) مع «السبب (تلقائي)» مثل «تراجع عن برقية ترقية رقم #45»، أو «تغييرات مباشرة بدون برقية جديدة»، ووضع كل عضو الحين ← وش بيصير، و«سيتم أيضاً استرجاع: …» للأشياء اللي ترجع معه.
فوقها «التراجع متاح حتى …»، والأعضاء اللي ما ينفع التراجع عنهم الحين تحت «لا يمكن التراجع عنهم الآن» مع السبب.
الكل محدد. شيل التحديد عن اللي ما تبي تتراجع عنه، أو استخدم «تحديد الكل» و«إلغاء تحديد الكل». العضو يتراجع عنه مع البرقيات التابعة له مع بعض.
اضغط «تأكيد التراجع (العدد)». التراجع يشتغل في الخلفية والنافذة تعرض التقدم، وما تنقفل وهو شغّال.
في النهاية يطلع «تم التراجع بنجاح» أو «تم التراجع جزئياً» أو «تعذّر التراجع عن البرقية»، مع زر «فتح البرقية #…» لكل برقية تراجع نزلت، ومين ما اكتمل وليش.

البرقية الأصلية تبقى في السجل وعليها «تم التراجع» أو «تراجع جزئي»، وبرقية التراجع عليها «تراجع عن #…» وكاتبها اللي ضغط التراجع. وفي صفحة التفاصيل بطاقة «سجل التراجع» فيها مين تراجع ومتى، وفي «سجلات البرقيات» ينزل سجل «↩️ تراجع عن برقية».

مين يقدر يتراجع ومتى؟

إدارة السيرفر (مالك السيرفر ومن عنده ADMINISTRATOR): أي برقية في القطاع.
كاتب البرقية: برقيته بس، وما دام عنده صلاحية تكتب نفس النوع: صلاحية البرقية نفسها، أو صلاحية صفحة تطلع نفس النوع، مثل «رصد الترقيات» للترقية أو «مراجعة طلبات الإجازة» للإجازة. والقائد كذا: يتراجع عن اللي كتبه هو بس.
المهلة 48 ساعة من وقت البرقية. بعدها التراجع لمالك السيرفر بس، والباقين يفتح لهم الزر «انتهت مهلة التراجع» مع بطاقة المالك وزر «مراسلة مالك السيرفر».
البرقيات اللي يطلعها النظام بنفسه ما لها كاتب، فالتراجع عنها للإدارة بس.

اللي ما يحق له يشوف الزر رمادي (والعضو اللي ما عنده أي صلاحية برقيات ما يشوفه أصلاً)، ولما توقف عليه يطلع السبب، مثل «التراجع متاح لأدمن السيرفر أو كاتب البرقية فقط — اطلب منهم ذلك» أو «لم تعد تملك صلاحية هذا النوع من البرقيات — اطلب من أدمن السيرفر التراجع عنها».

وش يرجّع التراجع لكل نوع؟

البرقية	التراجع
النقاط، ساعات العمل، أيام العمل، تقارير الإشراف	برقية بالعكس بنفس القيمة والتاريخ (والساعات بنفس المكان، والنقاط بنفس المصدر)
«إضافة رصيد إجازات» و«خصم رصيد إجازات»	برقية بالعكس بنفس الأيام، وينبهك لو الرصيد بيصير بالسالب
«عام»	تنحذف رسالتها من الديسكورد. الإعلان داخل اللعبة والتنبيهات اللي وصلت ما تنسحب
«توظيف»	برقية «فصل» تشيل منه اللي يشيله أي فصل، ولو كان توظيف عائد ترجع حالته السابقة. اسمه في الديسكورد ما يرجع مثل قبل التوظيف
«فصل» و«استقالة» و«تقاعد»	برقية «توظيف» على رتبته وبكوده، ويرجع تاريخ تعيينه الأصلي وقياديته والدورات والمسؤوليات والإنذارات اللي انشالت مع خروجه. ولو كوده صار لغيره ياخذ أقرب كود متاح
«ترقية» و«تنزيل رتبة»	برقية بالعكس ترجعه لرتبته، ويرجع كوده القديم لو البرقية غيّرته. والتراجع عن الترقية يرجّع بعد الإنذارات اللي انشالت بالترقية ومنع الترقية اللي ارتفع وتاريخ آخر ترقية وتاريخ بداية الاحتساب، ومكافأة الترقية تنعكس معها
«إنذار»	إعفاء من الإنذارات اللي لسا سارية، وتنعكس معه إجراءات مستويات الإنذارات اللي طلعت منه (غرامة، تنزيل رتبة، فصل)
«إعفاء من إنذار»	ترجع نفس الإنذارات بتاريخ انتهائها الأصلي، لو ما فات
«مكافأة» و«غرامة»	اللي ما تسلّمت تنلغى، واللي تسلّمت في اللعبة تنعكس ببرقية بالعكس بنفس المبلغ
«بدء إجازة»	تنتهي الإجازة، وما تنحسب في فترة الانتظار بين الإجازات، ويرجع الرصيد اللي انصرف عليها
«انتهاء إجازة»	الإجازة ترجع لين نهايتها الأصلية، لو ما فاتت
«حظر توظيف» و«إعفاء من الحظر»	البرقية المعاكسة على نفس الحظر، ولو الحظر فصل العضو يرجع موظف
التعيين والإعفاء، والدورات والمسؤوليات، و«تغيير الاسم والكود»	البرقية المعاكسة، أو يرجع الاسم والكود القديم
برقيات ضوابط الترقية	تنشال الخصومات والزيادات، ويرتفع المنع أو يرجع، ويرجع تاريخ بداية الاحتساب القديم

الأشياء اللي ترجع مع التراجع (الكود القديم، تاريخ آخر ترقية، تاريخ بداية الاحتساب، الإنذارات…) ترجع بس لو ما تغيّرت بعد البرقية وما خلصت مدتها: مثلاً الكود القديم يرجع لو العضو لسا لابس الكود اللي حطته البرقية. اللي ما يقدر يرجع تشوفه في المعاينة كملاحظة قبل ما تأكد.

متى ينقفل التراجع؟

برقية أحدث غيّرت نفس الشي: يطلع السبب مع زر «تراجع عن البرقية #… أولاً» لو تقدر تتراجع عنها، يفتح لك تراجع البرقية الأحدث فوق النافذة، ولما تخلص تتحدث المعاينة. ولو ما تقدر، يقولك مين يقدر (كاتبها أو أدمن السيرفر أو مالك السيرفر). يعني تتراجع من الأحدث للأقدم.
العضو ما عاد موظف: مثل ترقية لعضو انفصل بعدها، فتتراجع عن الفصل أول.
العضو محظور من التوظيف: التراجع عن فصله ينقفل لين يرتفع الحظر.
مكافأة أو غرامة ما تأكد وصولها في اللعبة: ينقفل لين تحدد هل وصلت، وزر «فتح المكافآت والغرامات» يوديك لها. شوف الهدايا والغرامات.
نظامها مطفي في القطاع: «النظام الخاص بهذه البرقية معطّل في هذا القطاع».
برقية طلّعها النظام مع برقية ثانية (مثل مكافأة الترقية): تنعكس مع البرقية الأصلية، مو لحالها.
برقية التراجع نفسها والبرقيات المستوردة من النسخة القديمة: ما لها تراجع أصلاً.

حدود البرقيات (عدد الأعضاء)

فريق أوركا بوت يقدر يحط حد أقصى لعدد الأعضاء في البرقية الوحدة لكل نوع، ونفس الحد لكل السيرفرات، والنوع اللي ما له حد «غير محدود». العد على الأعضاء المختلفين: عضو واحد بخمس دورات = عضو واحد.

في اللوحة: لو النوع له حد، خطوة اختيار الأعضاء تعرض «المحدد/الحد عضو محدد» ويحمر العداد لو تعدّيت و«التالي» ينقفل، وفي «الاستعلامات / بيانات الأعضاء» البرقية اللي لها حد يظهر عليها «المحدد/الحد» في القائمة وتنقفل لو تعدّيت.
في /برقية: القائمة مكتوب فيها «اختر الأعضاء (بحد أقصى …)»، والديسكورد أصلاً ما يقبل أكثر من 25.
لو تعدّيت ينرفض الإرسال: «الحد الأقصى لهذا النوع من البرقيات … عضو» مع «قلّل عدد الأعضاء أو أرسلها على دفعات.»

الحد ما ينطبق على الرصد (اليدوي والتلقائي)، ولا على إغلاق التوظيف، ولا على البرقيات اللي يطلعها النظام بنفسه.

فترات الانتظار للإجراءات الكبيرة

إجراءات تغيّر أكواد أو رتب أعضاء كثير، أو حالة القطاع كله، مرة وحدة، فبعد ما تنجح ما تقدر تعيدها إلا بعد مدة:

الإجراء	الانتظار
«ترتيب الاكواد»	ساعة
«إعادة حساب الأكواد» و«تغيير قالب اسم القطاع»	ساعة
«مزامنة رتب اللعبة» من «مزامنة الرتب مع اللعبة»	ساعة
«ترتيب الأكواد المشتركة» في إعدادات السيرفر	ساعة
«تغيير الرتبة الرئيسية»	3 ساعات
تفعيل القطاع أو إلغاء تفعيله	3 ساعات
«إعادة حساب أكواد السيرفر»	24 ساعة

الانتظار يبدأ بس لما ينجح الإجراء، و«ترتيب الاكواد» اللي ما غيّر شي ما يبدأ له انتظار. وقبل التأكيد ينبهك: «بعد التطبيق تبدأ فترة انتظار … لهذا الإجراء».
وقت الانتظار تفتح النافذة على «في فترة انتظار» مع «الوقت المتبقّي» و«يُتاح في»، وفي «ترتيب الاكواد» و«إعادة حساب الأكواد» و«تغيير الرتبة الرئيسية» تقدر «عرض التغييرات فقط» بدون تطبيق. ولو الإجراء للحين شغّال يطلع «الإجراء قيد التنفيذ».
الانتظار على القطاع كله (وعلى السيرفر كله في إجراءات «إعدادات السيرفر»)، مو عليك بس: لو غيرك سوّى الإجراء ينقفل عليك بعد. ولو الأمر عاجل، زر «تواصل مع الدعم» يوديك لديسكورد أوركا بوت. والبرقيات العادية والتراجع ما عليها فترة انتظار.

الصلاحيات

«برقياتي»: لكل من عنده صلاحية تكتب برقية في «صلاحيات الأوامر»: أي صلاحية برقية (مثل «ترقية» أو «إصدار إنذار»)، أو «تشغيل التوظيف (فتح/إغلاق)» أو «مراجعة طلبات التوظيف»، أو صلاحية رصد تعتمد برقيات («رصد الترقيات» أو «رصد غير المتفاعلين» أو «رصد رصيد الإجازات» أو «رصد مكافآت أماكن الحضور»)، أو «إدارة إجازات الأعضاء» أو «مراجعة طلبات الإجازة». «فتح صفحة البرقيات» و«عرض جدول سجل البرقيات» لحالها ما تكفي.
«عرض ملفات مسؤولي البرقيات» (عرض بس، مو خطيرة): تفتح «احصائيات مسؤولين البرقيات» وملف أي مسؤول وتفاصيل أي برقية كتبها، وتشوف كاتب البرقيات «المجهولة». وتنعطى معها تلقائياً «فتح صفحة البرقيات» و«عرض الموظفين».
التراجع ما له صلاحية خاصة: إدارة السيرفر، أو كاتب البرقية بالشروط اللي فوق.
قادة القطاع والإدارة يشوفون الصفحتين بدون أي صلاحية.

التفاصيل في صلاحيات الأوامر.

أوامر البوت

ما فيه أمر بوت للتراجع ولا لـ«برقياتي»، كلها من لوحة التحكم. البرقيات اللي تكتبها بـ/برقية تنحسب لك في «برقياتي» مثل برقيات اللوحة، وتلتزم بحدود البرقيات. وفي /معلومات الإجراء اللي انعكس يطلع جنبه «(تم التراجع عنها)»، وإجراء التراجع «(تراجع عن البرقية #…)». شوف أوامر البوت.

ملاحظات مهمة

التراجع عن «عام» يحذف رسالتها، وصفحتها تقول «حُذفت رسالة البرقية من الديسكورد (تراجع)». ولو ديسكورد رفض الحذف لنقص صلاحية في قناة البرقية، يطلع السبب باسم الصلاحية مثل «البوت لا يملك صلاحية VIEW_CHANNEL في قناة البرقية» أو MANAGE_MESSAGES.
الحظر على مستوى السيرفر يتراجع عنه في كل قطاعاته مع بعض.
التراجع عن «تنزيل رتبة» يكتب برقية ترقية ترجّعه لرتبته، لكنها مو ترقية جديدة: ما تصرف مكافأة ترقية، ولا تعفي إنذاراته، ولا ترفع منع الترقية، ولا تغيّر تاريخ آخر ترقية.

أسئلة شائعة

أقدر أحذف برقية نزلت بالغلط؟

ما فيه حذف، فيه «تراجع عن البرقية». خلال 48 ساعة يعكس اللي سوّته البرقية ببرقية جديدة بالعكس، والأصلية تبقى في السجل وعليها «تم التراجع». الاستثناء البرقية «عام»: التراجع عنها يحذف رسالتها من الديسكورد.

ليش زر «تراجع عن البرقية» رمادي عندي؟

لأن التراجع لإدارة السيرفر ولكاتب البرقية بس، والكاتب لازم تكون صلاحية النوع باقية معه. حتى القائد ما يتراجع عن برقية كتبها غيره. وممكن يكون السبب إن نظام البرقية مطفي في القطاع. وقف على الزر يطلع لك السبب، واطلب من كاتبها أو من الإدارة.

مرت 48 ساعة على البرقية، وش أسوي؟

بعد 48 ساعة التراجع لمالك السيرفر بس. لو أنت المالك يشتغل معك الزر عادي، ولو لا اضغطه يطلع لك «انتهت مهلة التراجع» مع بطاقة المالك وزر «مراسلة مالك السيرفر»، وهو يتراجع عنها.

ليش يطلب مني «تراجع عن البرقية #… أولاً»؟

لأن فيه برقية أحدث غيّرت نفس الشي للعضو، مثل ترقية ثانية بعد الترقية اللي تبي تعكسها. اضغط الزر وتراجع عن الأحدث أول، وبعدها المعاينة تتحدث وتكمل.

أقدر أتراجع عن بعض الأعضاء بس؟

إيه. شيل التحديد عن اللي ما تبي تتراجع عنهم قبل «تأكيد التراجع». البرقية تصير «تراجع جزئي»، وتقدر تتراجع عن الباقين بعدين ما دامت المهلة باقية.

ليش ما تظهر لي «برقياتي»؟

تحتاج صلاحية تكتب برقية، مثل صلاحية برقية أو صلاحية توظيف أو رصد أو إجازات. «فتح صفحة البرقيات» و«عرض جدول سجل البرقيات» لحالها ما تفتحها، فاطلبها من الإدارة في «صلاحيات الأوامر».

طلع لي «في فترة انتظار» لما جيت أسوي «ترتيب الاكواد»، ليش؟

لأن «ترتيب الاكواد» انطبق على قطاعك وغيّر أكواد قبل أقل من ساعة، منك أو من قائد ثاني. النافذة توريك الوقت المتبقّي ومتى يتاح، وتقدر تعرض التغييرات بدون تطبيق لين يخلص العداد.