ربط البرقيات والأحداث مع فايف ام — اعدادات الربط باللعبة

اعدادات الربط باللعبة في أوركا بوت لقطاعات فايف ام (FiveM): وش يصير داخل اللعبة مع كل برقية، ووش يسوي النظام لما لاعب ينضم للوظيفة أو يتركها أو تتغير رتبته.

مكان الصفحة: لوحة القطاع ← «البرقيات وربط الأحداث» ← «اعدادات الربط باللعبة» — لوحة القطاع ← «الإدارة والصلاحيات» ← «السجلات» ← تبويب «الإعدادات» ← «قناة سجل تغيير الوظيفة»

صفحة «اعدادات الربط باللعبة» في أوركا بوت هي اللي تربط البرقيات والأحداث مع اللعبة لقطاعات فايف ام، وباتجاهين: وش يصير داخل اللعبة لما تنفّذ برقية من النظام، ووش يسوي النظام لما لاعب يستلم وظيفة القطاع داخل اللعبة أو يتركها أو تتغير رتبته. وهنا بعد تعرف «قناة سجل تغيير الوظيفة» اللي تسجّل هالتحركات، ووش يصير لما يكون اللاعب أو السيرفر طافي.

ماذا تقدم الصفحة؟

«وضع التنفيذ لكل نوع برقية» في قسم «عند تنفيذ إجراء في النظام ← ماذا يحدث في اللعبة»: لكل نوع برقية تختار (حسب النوع) تغيير فعلي فوري داخل اللعبة، أو تنبيه بس، أو «لا شيء».
«إجراء النظام لكل حدث» في قسم «عند حدوث إجراء في اللعبة ← ماذا يحدث في النظام»: وش يسوي النظام لما لاعب ينضم لوظيفة القطاع أو يغادرها أو تتغير رتبته، أو ينضم لها وهو ممنوع من التوظيف.
أرقام التنفيذ للقطاع كامل فوق الصفحة، وبحث واحد يفلتر القسمين مع بعض.

خطوة بخطوة: تعديل الإعدادات

افتح لوحة القطاع ← «البرقيات وربط الأحداث» ← «اعدادات الربط باللعبة».
اكتب اسم النوع أو الحدث في «ابحث عن نوع برقية أو حدث...»، أو اسم مجموعته مثل «شؤون الأفراد» أو «الانضباط».
اختر خيار كل نوع في «وضع التنفيذ لكل نوع برقية»، وخيار كل حدث في «إجراء النظام لكل حدث» (التعديل للإدارة، والقائد يشوفها «للعرض فقط»). تحت كل صف شرح خياراته، وفي الجوال تضغط على الصف وتنفتح خياراته مع شرحها.
تبي ترجع الافتراضي؟ اضغط «إعادة تعيين الكل» في البطاقة.
اضغط «حفظ التغييرات» في شريط «يوجد تغييرات لم تُحفظ بعد»، أو «إلغاء». قبل الحفظ ما يتغير شي، وكل بطاقة لها حفظها: إذا عدّلت البطاقتين تأكد إنك حفظت الاثنتين.

من النظام إلى اللعبة: «وضع التنفيذ لكل نوع برقية»

كل نوع برقية فيه «لا شيء» (البرقية تبقى في الديسكورد واللوحة وما يصير شي داخل اللعبة)، و«تنبيه فقط» أو «تنبيه» (إشعار على شاشة اللاعب بدون أي تغيير). وبعض الأنواع فيها خيار فوري يطبّق التغيير نفسه داخل اللعبة مع التنبيه. عمود «الافتراضي» هو اللي يبدأ عليه القطاع الجديد، والصفحة نفسها تعرض الوضع الحالي لقطاعك:

نوع البرقية	الخيار الفوري	الافتراضي
«توظيف»	«تغيير الرتبة فوريًا»	«تنبيه فقط»
«فصل» و«استقالة» و«تقاعد» و«بدء إجازة»	«حذف الرتبة فوريًا»	الفوري
«ترقية» و«تنزيل رتبة»	«تغيير الرتبة فوريًا (إن كان في القطاع)»	الفوري
«تغيير الاسم والكود»	«تغيير فوري»	الفوري
«انتهاء إجازة»	«إعادة الرتبة فوريًا»	«تنبيه فقط»
«مكافأة» و«غرامة»	«إعطاء فوري» و«سحب فوري»	«تنبيه فقط»
«حظر توظيف» و«إعفاء من الحظر»	ما فيه	«تنبيه فقط»
«إنذار»، «منح دورة» و«سحب دورة»، «منح مسؤولية» و«سحب مسؤولية»، «عام»، «إضافة رصيد إجازات» و«خصم رصيد إجازات»، وأنواع «القادة والأركان» و«تحكمات القادة» و«النقاط» و«ضوابط الترقية»	ما فيه	«تنبيه»

وش يعني الخيار الفوري بالضبط؟

سحب الوظيفة ما يصير إلا إذا اللاعب لابس وظيفة قطاعك لحظة التنفيذ. إذا كان في وظيفة قطاع ثاني أو وظيفة ما يديرها النظام، ما نلمسها والإجراء يطلع «أُلغي». وفي «بدء إجازة» لازم الإجازة تكون للحين شغّالة.
إجراءان بس يعطونه وظيفة قطاعك ويستبدلون أي وظيفة لابسها: «توظيف» على «تغيير الرتبة فوريًا»، و«انتهاء إجازة» على «إعادة الرتبة فوريًا» اللي يرجّع وظيفته برتبته الحالية أول ما تنتهي الإجازة. عشان كذا الافتراضي فيهم «تنبيه فقط».
«توظيف» على «تنبيه فقط» يوصله «تم توظيفك — توجّه إلى مركز الوظائف لاستلام وظيفتك»، ويستلم الوظيفة بنفسه.
«ترقية» و«تنزيل رتبة» ما يدخّلونه الوظيفة: يغيّرون درجته إذا كان لابسها، وإلا يوصله «تمت ترقيتك — توجّه إلى مركز الوظائف لاستلام وظيفتك» (أو «تم تنزيل رتبتك — …»).
«تغيير فوري» يغيّر اسمه داخل اللعبة. وفي vRP ما فيه اسم داخل اللعبة يتغيّر، فيتغير اسم الديسكورد بس — شوف الفريموركات المدعومة.
«إعطاء فوري» و«سحب فوري» يضيفون المبلغ لمحفظة اللاعب أو يخصمونه مباشرة. وعلى «تنبيه فقط» أو «لا شيء» المبلغ ما يتحرك، والسجل يبقى بانتظار التسليم اليدوي في الهدايا والغرامات.
برقية «عام» توصل بس للمتصلين اللابسين وظيفة القطاع لحظة نشرها، وما تنحفظ للي يدخلون بعدين.

من اللعبة إلى النظام: «إجراء النظام لكل حدث»

الافتراضي «لا شيء» للأحداث الثلاثة: النظام ما يلاحق اللي يصير داخل اللعبة من نفسه، حتى تغيّر الرتبة، إلا إذا فعّلته هنا. الاستثناء حالتين تحت تشتغلان بدون تفعيل: الممنوع من التوظيف («إلغاء التوظيف» افتراضياً)، وإنهاء الإجازة لما يرجع العضو لوظيفة القطاع.

الحدث	متى يصير؟	الخيارات	الافتراضي
«انضمّ للوظيفة»	لاعب مو عضو في القطاع استلم وظيفته	«لا شيء» · «توظيف صامت» · «بلاغ توظيف»	«لا شيء»
«غادر الوظيفة»	عضو نشط ترك وظيفة القطاع	«لا شيء» · «طرد صامت» · «بلاغ طرد»	«لا شيء»
«تغيّر الرتبة»	درجة عضو داخل اللعبة صارت غير رتبته في النظام	«لا شيء» · «ترقية/تنزيل صامت» · «ترقية/تنزيل»	«لا شيء»
«في حال انضم لاعب ممنوع من التوظيف»	لاعب عليه حظر توظيف في القطاع استلم وظيفته	«إلغاء التوظيف» · «رفع الحظر»	«إلغاء التوظيف»

«لا شيء»: الحدث يتسجل بس في «قناة سجل تغيير الوظيفة».
الصامت والكامل: الاثنين ينشئون برقية حقيقية («توظيف» أو «فصل» أو «ترقية» أو «تنزيل رتبة») تنطبق على العضوية والرتبة ورتب الديسكورد، وسببها «تم تنفيذ الإجراء من داخل اللعبة». الكامل ينشرها في قناة نوعها من قوالب البرقيات، والصامت ما ينشرها.

تفاصيل تهمك:

التوظيف من اللعبة يكون على الرتبة اللي تقابل درجته. وإذا درجته رتبة ركن يتوظف على الرتبة الأساسية حقتها، وإذا رتبة قيادية يتوظف على أدنى رتبة. و«تغيّر الرتبة» ما ينقل أحد لرتبة قيادية، ولا يحسب الانتقال بين رتبة والركن التابع لها ترقية أو تنزيل: اللعبة ما تعيّن أحد في القيادة أبداً.
«غادر الوظيفة» ما ينطبق على عضو في إجازة. وإذا عضو في إجازة استلم وظيفة القطاع داخل اللعبة، تنتهي إجازته تلقائياً بملاحظة «عاد إلى القطاع أثناء سريان إجازته»، حتى لو الأحداث كلها على «لا شيء».
لو انتقل عضو من وظيفة قطاعك مباشرة لوظيفة قطاع ثاني مو موظف فيه، ينحسب انضمام للقطاع الثاني بس: إعداد «غادر الوظيفة» حق قطاعك ما ينطبق، ويوصلك سجل المغادرة. وفي «وضع الرتب الموحّد» من إعدادات السيرفر ينحسب الاثنين: خروج من قطاعك ثم انضمام للثاني.
الممنوع من التوظيف يتطبّق عليه إعداده مهما كان «انضمّ للوظيفة». «إلغاء التوظيف» يرجّعه لوظيفته السابقة بدون توظيف ويوصله «أنت ممنوع من التوظيف في هذا القطاع — تمت إعادتك لوظيفتك السابقة»، و«رفع الحظر» ينشئ برقية «إعفاء من الحظر» ثم يمشي على إعداد «انضمّ للوظيفة» عادي. شوف نظام منع التوظيف.
التنقّل الحر: أصحاب «رتب الإدارة» و«رتب اللاعبين المعتمدين» من إعدادات السيرفر، والرتب اللي عليها «صلاحية القيادة» في أي قطاع، ما ينطبق عليهم شي من هالقسم، حتى حظر التوظيف وإنهاء الإجازة: البوت يسجّل تحركاتهم في قناة السجل بس.

قناة سجل تغيير الوظيفة

مكانها «السجلات» ← تبويب «الإعدادات» ← أول بطاقة «قناة سجل تغيير الوظيفة»: اختر القناة واضغط «حفظ التغييرات»، أو امسحها عشان توقف السجل. وإذا حددت قناة «سجل تغير الوظيفة» في معالج إنشاء القطاع، تكون محفوظة هنا من البداية.

السجل ينرسل دايم لما تكون القناة محددة، مهما كانت إعدادات «إجراء النظام لكل حدث»:

«انضم الي قطاع …» (أخضر)، ومعها «🚫 انضم لوظيفة القطاع داخل اللعبة وهو غير مسجل كعضو» إذا اللاعب مو عضو.
«غادر قطاع …» (أحمر)، وتصير برتقالية «غادر القطاع بدون إجازة أو إنهاء خدمة ⚠️» إذا عضو نشط طلع بدون إجازة ولا إنهاء خدمة.
«ترقية في قطاع … ⏫» و«تنزيل رتبة في قطاع … ⏬» لعضو تغيّرت درجته داخل اللعبة. أما الدرجة اللي يغيّرها النظام نفسه ببرقية فما تتسجل هنا.
«تحرّك أحد أعضائك بين القطاعات 🔄» و«ترقية لأحد أعضائك في قطاع آخر ⏫» (أو «تنزيل رتبة لأحد أعضائك في قطاع آخر ⏬») لعضو في قطاعك يتحرك في وظائف ثانية.

رسائل الانضمام والمغادرة والرتبة فيها «ديسكورد اللاعب» و«الأسم بالهوية» و«بيانات اللاعب» (معرّفاته في فايف ام مثل license و steam، بدون الـ IP)، ومن وين لوين.

«القطاعات المخفية» في «قائمة المتصلين» ← «الإعدادات»: أي حركة من وظيفة مخفية أو إليها ما تنسجل في قناتك، والإخفاء ما يغيّر أي إجراء. وإذا سيرفرك فيه وظيفة اسمها admin، القطاع الجديد يبدأ وهي مخفية — شوف نظام المتصلين.
البوت يحتاج في القناة VIEW_CHANNEL وSEND_MESSAGES وEMBED_LINKS، وإلا يرفض الحفظ ويقول لك وش الناقص.

لما يكون اللاعب أو السيرفر طافي

اللاعب طافي: الإجراء يبقى «بانتظار اللعبة» ويتنفذ أول ما يدخل السيرفر. وإذا دخل وهو ما عاد عضو في القطاع، التوظيف أو الترقية أو التنزيل اللي ينتظره يتلغى وما يتنفذ شي.
السيرفر طافي أو ما يرد: كل شي ينتظر ما عدا برقية «عام» (ما تنحفظ)، وأول ما يرجع السيرفر ويتصل يرسل النظام المنتظر للاعبين المتصلين لحاله، ويعيد المحاولة تلقائياً وهم متصلين.
اللعبة رفضت: إذا السبب مؤقت يبقى الإجراء ينتظر وسببه ظاهر، وينعاد تلقائياً (المكافأة أو الغرامة المرفوضة تنعاد لما يدخل اللاعب المرة الجاية). وإذا السبب ما ينحل بالإعادة يصير «فشل».
آخر إجراء على الوظيفة هو اللي يتنفذ: رقّيت عضو طافي ثم فصلته قبل لا يدخل؟ يتنفذ الفصل بس، والترقية تطلع «استُبدل». هذا لبرقيات التوظيف والترقية والتنزيل والفصل والاستقالة والتقاعد وبدء الإجازة، وباقي البرقيات مثل التنبيهات وتغيير الاسم كلها توصله.
الإعداد ينقرأ وقت التنفيذ: غيّرت وضع النوع قبل لا يدخل اللاعب؟ يمشي الجديد، ولو صار «لا شيء» يطلع «لم يُطبّق (الإعداد الحالي: بدون)».
تغييرات صارت داخل اللعبة والربط طافي: لما يرجع السيرفر يتصل، أو يدخل اللاعب، أو يرجع أوركا بوت يشتغل، النظام يقارن وظيفة كل لاعب متصل باللي عنده ويطبّق على الفرق نفس «إجراء النظام لكل حدث». وإذا فيه إجراء من اللوحة ينتظر نفس العضو (مثل فصل ما تنفّذ)، اللوحة تفوز. واللاعب غير المتصل ما ينحسب أنه ترك الوظيفة، ورسالة السجل تنرسل بس إذا وظيفته السابقة معروفة.

حالة التنفيذ في اللعبة

فوق الصفحة: «إجمالي البرقيات»، «نُفِّذت في اللعبة»، «بانتظار التنفيذ»، «فشل التنفيذ»، «بانتظار مراجعة» (مكافأة أو غرامة ما يُعرف هل وصل مبلغها، وتقرر فيها من «الهدايا والغرامات»)، «استُبدلت»، «ملغاة».
في صفحة «البرقيات» عمود «حالة اللعبة»: «بانتظار اللعبة»، «يُعاد المحاولة» (مكافأة أو غرامة تعذّر تسليمها وبتنعاد المحاولة)، «بانتظار مراجعة»، «جزئي»، «تم في اللعبة»، «فشل»، أو «—» إذا ما بقى شي يتنفذ داخل اللعبة.
داخل البرقية بطاقة «حالة التنفيذ في اللعبة» فيها حالة كل عضو وسبب الرفض إذا فيه — شوف نظام البرقيات.

الصلاحيات

الصفحة لقادة القطاع والإدارة (مالك السيرفر واللي عنده ADMINISTRATOR في الديسكورد)، وما تتفوّض لأحد من «صلاحيات الأوامر».
تعديل «وضع التنفيذ لكل نوع برقية» و«إجراء النظام لكل حدث» للإدارة بس، والقائد يشوفهم «للعرض فقط».
«قناة سجل تغيير الوظيفة» للقائد والإدارة: القائد يختار من قنوات تصنيفات قطاعه بس، والإدارة أي قناة. و«القطاعات المخفية» في «قائمة المتصلين» يعدّلها القائد والإدارة.

التفاصيل في مستويات الوصول والصلاحيات.

ملاحظات مهمة

لو حوّلت «مكافأة» أو «غرامة» للخيار الفوري، المكافآت والغرامات اللي حالتها «في الانتظار» في «الهدايا والغرامات» تنصرف للاعب داخل اللعبة لحالها أول ما يكون متصل. إذا ما تبي كذا، حدّدها «تحديد كـ منتهية» أو «تحديد كـ ملغية» قبل التحويل.

وضع تسليم المكافآت والغرامات يتحدد هنا بس: بطاقة «التسليم التلقائي مفعّل» (أو «التسليم التلقائي غير مفعّل») في «الهدايا والغرامات» تعرضه، وزرها «الإدارة من البرقيات» (أو «عرض من البرقيات» للقائد) يوديك لهالصفحة.

البرقيات اللي يسويها النظام لأعضائك الحاليين وقت إنشاء القطاع ما توصل للعبة، لأنها تسجّل شي عندهم من قبل، وحالتها تطلع «لم يُرسل (مزامنة)».

أسئلة شائعة

لاعب استلم وظيفة القطاع داخل اللعبة، ليش ما انضاف عضو؟

لأن «انضمّ للوظيفة» افتراضياً «لا شيء»، فالبوت يسجّل الحدث في قناة السجل بس. الإدارة تقدر تخليه «توظيف صامت» أو «بلاغ توظيف»، أو توظّفه أنت ببرقية «توظيف».

وصلني «غادر القطاع بدون إجازة أو إنهاء خدمة ⚠️»، هل انفصل العضو؟

الرسالة نفسها ما تفصله: معناها إن عضو نشط ترك وظيفة القطاع داخل اللعبة وهو مو في إجازة. ينفصل تلقائياً بس إذا «غادر الوظيفة» على «طرد صامت» أو «بلاغ طرد»، وإلا يبقى عضو لين تفصله أنت ببرقية «فصل».

رقّيت عضو وما تغيّرت رتبته داخل اللعبة، ليش؟

الترقية تغيّر درجته بس إذا كان لابس وظيفة القطاع، وإلا يوصله «توجّه إلى مركز الوظائف لاستلام وظيفتك»، وإذا كان طافي تنتظره لين يدخل. شوف «حالة اللعبة» للبرقية، وتأكد إن «ترقية» مو على «تنبيه فقط» أو «لا شيء».

انتهت إجازتي وما رجعت لي الوظيفة داخل اللعبة، ليش؟

«انتهاء إجازة» افتراضياً «تنبيه فقط»: يوصلك «انتهت إجازتك» والوظيفة ما ترجع لحالها، فتستلمها بنفسك. تبيها ترجع تلقائياً؟ الإدارة تغيّرها في «اعدادات الربط باللعبة» إلى «إعادة الرتبة فوريًا».

عطيت مكافأة وما وصل المبلغ للاعب، ليش؟

«مكافأة» افتراضياً «تنبيه فقط»: اللاعب يوصله تنبيه والمبلغ ما يتحرك، والسجل يبقى للتسليم اليدوي في «الهدايا والغرامات». الإدارة تقدر تخليها «إعطاء فوري» عشان ينضاف لحاله، وإذا اللاعب طافي ينتظر لين يدخل.

ليش ما يوصل شي في قناة سجل تغيير الوظيفة؟

تأكد إن القناة محددة في «السجلات» ← «الإعدادات»، وإن البوت عنده فيها VIEW_CHANNEL وSEND_MESSAGES وEMBED_LINKS. وإذا الوظيفة الثانية في «القطاعات المخفية»، الحركة منها وإليها ما تنسجل.

أصحاب رتب الإدارة يتنقّلون بين الوظائف وما يتوظفون ولا ينفصلون، ليش؟

أصحاب «رتب الإدارة» و«رتب اللاعبين المعتمدين» والرتب اللي عليها «صلاحية القيادة» يتنقّلون بحرية: البوت يسجّل حركتهم في قناة السجل بس، وما ينطبق عليهم «إجراء النظام لكل حدث».